மண மனம்

மண மனம்  

மாலையிட்டுக் கூடவில்லை 

தாலி கட்டி ஆளவில்லை - வீடு 

கட்டி வாழவில்லை இல்லையே - நல்ல

ஜோடி இங்கு சேர்ந்து போனதிங்கு உண்மையே!

மேளம் கொட்டி ஊதவில்லை

தாளமிட்டுப் பாடவில்லை - ஊரைக் 

கூட்டிச் சொல்லவில்லை இல்லையே - ஒரு

திருமணம் தான் நடந்து போனதுண்மையே!

சாத்திரங்கள் பார்க்கவில்லை

சீதனங்கள் கோரவில்லை - இங்கு

காத்திருக்க நேரமில்லை இல்லையே  நாங்கள்

சேர்ந்திருக்கப் போவதிங்கு உண்மையே

கேலி கண்டு அஞ்சவில்லை

தோல்வி கண்டு துஞ்சவில்லை - போலி 

வாழ்க்கை நாடவில்லை இல்லையே -  இன்று

போல என்றும் இணைந்து நிற்போம் உண்மையே!

துன்பம் கண்டு துவளவில்லை

தூற்றல் கண்டு மருளவில்லை - உண்மைக்

காதலென்றும் சாவதில்லை இல்லையே - பெரும்

சாதனையைப் படைத்து விட்டோம் உண்மையே! 

அவ்வைமகள் (Dr Renuka Rajasekaran)